Eins og sjá má í myndbandinu setur Óskar íslenska lambalærið í spænskan búning, enda þekkir hann vel spænska matargerð þar sem hann býr í Barcelona. Það fer lambinu sérlega vel og er tilvalin tilbreyting frá gamla góða lærinu „eins og mamma gerir það“. Hann kryddar með paprikudufti, hvítlauk, rósmaríni, sítrónusafa, hunangi, salti og svörtum pipar og verður lærið skemmtilega bragðsterkt. Með í skúffuna setur hann síðan sætar kartöflur skornar í litla teninga og beikon í bitum kryddað með timjan. Með þessu ber hann fram sína heimatilbúnu „original“ hvítlaukssósu sem hann þróaði fyrst á Argentínu fyrir tuttugu árum eða svo. En allt um það má finna á mbl.is. Hér skoðum við hvað má gera við ljúffenga lambið sem verður afgangs eftir helgarmatinn. Óskar kemur með tillögur að biximat, marokkóskum lambapottrétti og pítusamloku með lambi.