Stundum fæ ég svo hryllilegt leið á morgunmat og langar helst bara í crossant og gott kaffi eins og þeir gera þarna í Frakklandi. Vissulega er crossantið og kaffið góð hugmynd, en það er kannski ekki það sem undirrituð á að vera að stöffa sig með alla daga. Grænn sjeik og chia-grautur hafa notið mikilla vinsælda á heimilinu en stundum getur það gerst að maður hreinlega fái nóg og þá þarf nýtt krydd í tilveruna.
Þess vegna ákvað ég að leika aðeins með hafragrautinn í morgun. Það heppnaðist svona líka vel að nú ætla ég að deila uppskriftinni með ykkur. Það voru engum töfrabrögðum beitt og yfir þessari uppskrift var ekki legið tímunum saman - það sem var hendi næst lenti í pottinum og það kom á óvart hvað það var bragðgott. Grauturinn veitti líka fantagóða fyllingu.
Hafragrautur fyrir svanga húsmóður
1 bolli vatn
1/2 bolli haframjöl
3 tsk chia-fræ
1 tsk Morning Sunshine frá Indiska
tæplega handfylli af hnetumixi H-Berg (Orku Pokinn)
Allt hráefni sett saman í pott og látið sjóða saman í nokkrar mínútur.
Verði ykkur að góðu!