Matur | Eldhús | mbl | 19.10.2016 | 23:55 | Uppfært 21.10.2016 11:20

Gulrótarterta Alberts

Albert kann að feta milliveginn við að baka hollar en bragðgóðar tertur. Árni Sæberg

Albert Eiríksson er listamaður í eldhúsinu og fagmaður í framkomu. Það er því ekki að undra að hann heldur úti einu vinsælasta matarbloggi landsins, Albert í eldhúsinu. Hér deilir hann með okkur gulrótartertu með kasjúkremi sem hann bakaði sérstaklega í tilefni þess að nýr matarvefur mbl.is opnar í dag.

Botn

1 1/2 bolli rifnar gulrætur

1 1/3 bolli möndlur

7-8 döðlur, saxaðar gróft

1 tsk. múskat

1 tsk. kanill

1/3 tsk. salt

örlítið chili

börkur af 1/2 sítrónu

2/3 bollar kókosmjöl

1 msk. chiafræ

1 msk. vatn

Krem

1 bolli kasjúhnetur

1 tsk. gott síróp

1-2 msk. kókosolía, fljótandi

safi úr einni sítrónu

1/3 tsk. kardimommur

Botn
Setjið gulrætur, möndlur, döðlur, sítrónubörk og krydd í blandarann eða matvinnsluvél og blandið vel saman. Bætið við kókosmjöli, chiafræjum og vatni og blandið saman í smá stund. Takið kringlótt tertuform og setjið á tertudisk (ekki nota botninn) og hellið maukinu þar í, þjappið og kælið á meðan kremið er útbúið.

Krem
Leggið kasjúhnetur í bleyti í um 20 mín. Hellið vatninu af og setjið í blandarann ásamt sírópi og sítrónusafanum, maukið mjög vel. Bætið loks kókosolíu saman við og blandið áfram. Setjið yfir tertuna og skreytið með rifnum sítrónuberki og berjum.