Áslaug Snorradóttir, ljósmyndari og matarlistakona, fer ótroðnar slóðir í öllu sem hún tekur sér
fyrir hendur. Hún er víðfræg fyrir að halda litríkar og lífrænar veislur þar sem náttúran er í aðalhlutverki.
„Nú fer gróðurinn að lognast út af og upplagt að nýta síðustu berin,“ segir Áslaug, sem virðist hafa yfirnáttúrulegar leiðir til að finna góðgæti nánast hvar sem er. Hún tekur sigri hrósandi upp grein með agnarsmáum og dísætum rifsberjum og litla grein með hindberjum eftir göngu um Laugardalinn. Hún lætur þó ekki staðar numið við berin og segir svo ansi margt
vera ætt í náttúrunni sem nýta mætti betur. „Ég nota blóm mikið og er á því að við ættum öll að borða meira af blómum og fá smá lit í kroppinn. Hansarósir eru til dæmis dísætar á bragðið og stórkostlega góðar hrærðar út í rjóma sem millilag á tertur.“
Við skreytingar og eldamennsku nýtir hún uppskeru landsins og gerir sér gjarnan ferð austur
fyrir fjall í leit að fersku hráefni. „Orkan þar er svo góð, eins og sést á afurðum landsins. Ekki bara úti í náttúrunni heldur eru bestu flatkökurnar líka þar. Ég nota flatkökur mikið í veislur. Þær eru í raun hinar íslensku vefjur. Ég kalla þær kúrekavefjur og panta alltaf nýbakaðar
fjallagrasakökur hjá HP flatkökum á Selfossi. Það er auðvelt að rúlla þeim upp en mér finnst skemmtilegast að bera þær fram opnar og láta innihaldið skína.“
Að þessu sinni var Áslaug með litríkt mauk sem álegg, í tilefni haustlitanna varð bleikt og appelsínugult fyrir valinu. Álegg á maukið var svo morgunfrúr, alls konar spírur og rifið rauðkál.
„Nýverið bættust við sólblómaspírur í verslunum. Þær eru æði,“ segir Áslaug, sem segist nota spírur í nánast hvað sem er. Með súkkulaði, út í hollustusjússa og á brauð.
Bleikur rauðrófuhummus
1 dós kjúklingabaunir, vökvanum hellt af og baunirnar skolaðar
1 bökuð rauðrófa, skorin í teninga
2 hvítlauksrif,
safi af 1 sítrónu
½ bolli ólífuolía
2 msk. sesamsjör
1/3 tsk. sjávarsalt
Þeytt tómatsmjör
100 g sólþurrkaðir tómatar
100 g smjör
½ hvítlaukur
1 msk. óreganó
Setjið öll hráefnin í matvinnsluvél og maukið þar til blandan er slétt.
Kálskálar
Veljið stærðarinnar hvítkálshaus með sterkum blöðum sem nota má
sem skálar. Raðið skálunum á borð: Fyllið þær svo með hvers kyns gúmmelaði. Hér er notað það ferskasta úr matjurtagarðinum. Hakkað grænkál, steinselja, rauðkál og önnur kálblöð úr garðinum, spergilkál, blóm, valhnetur og bláber. Blandan er svo vætt með olíu og sérríediki.
Kastaníuhattar
Þessa fallegu íslensku kastaníusveppi fékk Áslaug í Frú Laugu, sem er rétt handan við hornið frá heimili hennar. Hún fyllir þá svo með stórkostlegu kryddmauki og býður upp á þá ferska.
Kryddmauk
½ dl graslaukur
½ dl mynta
2 msk. af óreganó
2 dl steinselja
300 g grísk jógúrt
Pipar eftir smekk
Hér má gjarnan nota annað
krydd úr garðinum og grænkál.
Orkuvatn
Áslaug setur gjarnan ferskar jurtir, grænmeti og ávexti í vasa sem hún fyllir svo með vatni og notar sem vatnsbrunn á veisluborðinu. Hengd er falleg ausa á hlið vasans og allir geta vökvað
sig eftir þörfum. Í vasanum hér er hún með wakame-þara, sítrónu, sellerí, rifsberjagrein, grænkál og fleira góðgæti úr garðinum.
Borðið skreytir hún með mismunandi staupum sem hún fyllir af vatni með kröftugum fjallagrösum og orkuskotum sem hún pressar í safapressu.
Grænn sjúss
1 agúrka
2 vænir sellerístilkar
2 sítrónur
1 lúka grænkál
Flug og lending
1 nýupptekin rauðrófa
3 cm engifer
1 sítróna
Allt sett í safapressu og drukkið við fyrsta tækifæri. Ef bjóða á upp á sterkt áfengi
er gaman að vera með fleyg á borðinu sem gestir geta hellt út í náttúrusjússana ef svo ber undir.
Klassískur sætur endir Áslaug flippar nýbökuðum kleinum í sinn eigin stíl með því að
stinga þeim á trjágreinar og skreyta borðið með þeim. „Ef dottið er í spariskap er æði að dýfa
þeim í súkkulaði og möndluspæni.“
Góð ráð frá Áslaugu