Albert Eiríksson matarbloggari og séntilmaður kemur hér með ljúffenga uppskrift að smárétti eða forrétti sem sómir sér vel á hvaða hátíðarborði sem er. Þessi réttur er mjög einfaldur í gerð en Albert segir rauðlaukinn vera leyndardóminn. „Súrsaður rauðlaukur er alveg ótrúlega góður og svo er frekar einfalt að útbúa hann.“ Rétturinn er fljótlegur í gerð séu gæsabringan, brauðið og hlaupið keypt tilbúin. Það þarf ekki alltaf að gera allt frá grunni!
Grafnar gæsabringur á snittubrauði með krækiberjahlaupi og súrsuðum rauðlauk
Skerið niður snittubrauð og smyrjið með rjómaosti eða sósu ef vill. Raðið niðursneiddum gæsabringunum á brauðið og setjið því næst súrsaðan rauðlauk (sjá uppskrift hér að neðan) og loks gott krækiberjahlaup.
Súrsaður rauðlaukur
1 stór rauðlaukur
1/2 b. edik
1 b. vatn
2 msk. sykur
1 tsk. salt
smá pipar
Skerið rauðlaukinn í tvennt og síðan í sneiðar. Setjið hann í hreina glerkrukku. Sejtið edik, vatn, salt og pipar í pott og hitið upp að suðu. Slökkvið undir og látið standa í ca. 5 mín. Hellið yfir laukinn og lokið. Geymið í ísskáp í um viku. Þá er tilbúinn súrsaður rauðlaukur.