„Skammtarnir hjá Subway í Bandaríkjunum eru 20% stærri en í Evrópu. Það er ekkert leyndamál," segir Guðmundur Sigurðsson framkvæmdastjóri Subway á Íslandi varðandi frétt sem birtist í gærkvöldi. Í fréttinni sjást tvær myndir af Subway samlokum. Önnur er tekin á Íslandi en hin í New York en þær eru báðar sagðar vera af gerðinni BLT sem inniheldur meðal annars beikon, kál og tómata. Myndirnar hafa valdið miklu fjaðrafoki á facebook en samlokan keypt hér á landi er mun minni og kostar meira.
„BLT er ekki á matseðlinu hjá Subway í Bandaríkjunum heldur bjóða þeir upp á BMT sem inniheldur þrjár tegundir af kjöti. Auðvitað er hægt að biðja um hvað sem er á samlokuna en mér sýnist þetta vera BMT. Hér er líklega ekki verið að bera saman, sama bátinn," segir Guðmundur. „Ef þetta er sami báturinn þá getur verið munur á hvernig álegginu er raðað á bátinn og myndataka eins og þessi gefur ekki endilega rétta sýn á samsetningu bátsins. Samlokan frá USA er þverskorin og sýnir því vel innihaldið meðan hin myndin sýnir endann á brauðinu.“
Guðmundur segir Subway á Íslandi leggja mikið upp úr því að hafa hæfilegt magn af áleggi og bátarnir séu með ódýrasta skyndibita á Íslandi. „Subway á Íslandi er einn hagkvæmasti valkostur í skyndibita á landinu. Það að bera saman verðlagningu á vöru í Bandaríkunum og Íslandi er oft erfið þar sem bæði hráefnisverð og launakostnaður er mun hærra á Íslandi samanborið við USA.“