Nýr veitingastaður opnar á Hverfisgötu

Matbar er nýr veitingastaður sem opnar í kvöld að Hverfisgötu 26. Aðaleigandi staðarins er Guðjón Hauksson athafnamaður. „Staðurinn opnar snemma og lokar seint og áhersla er lögð á léttleikandi matargerð undir áhrifum frá einfaldleika ítalska eldhússins og aðferðum frá Skandinavíu,“ segir Guðjón en matseðillinn breytist yfir daginn.
Snemma dags er deli & take away allsráðandi. Matseðillinn breytist svo í tapasrétti þegar líður á daginn. Þess á milli er boðið upp á svokallað apeprativo að ítölskum sið.

„Í staðinn fyrir að vera með happy hour ætlum við frekar að bjóða upp á ítölsku aperitivo-hefðina þar sem fólk getur fengið sér drykk og einhverja smábita með úr delí-borðinu eftir vinnu.“ 

Með sér til liðs fékk Guðjón HAF stúdíó í hönnun staðarins, „markmiðið var að skapa tímalausa og fágaða hönnun sem myndi vaxa og dafna í miðbæ Reykjavíkur,“ segir Guðjón en áhersla var á íslenskt handbragð og efni.

Í matseðlagerðina og konseptvinnu fékk Guðjón með sér matreiðslumeistarann Gísla Matt sem hefur áður rekið veitingastaðina Mat og drykk og einnig Slippinn í Vestmannaeyjum með fjölskyldu sinni við góðan orðstír. „Egill Pietro og Guðlaugur Ingibjörnsson munu taka við keflinu og verða vaktstjórar Matbars,“ segir Guðjón, spenntur fyrir kvöldinu.