Það getur verið flókið að viðhalda fullkomnu skipulagi í frystinum en við höfum rekist á margar góðar og virðingarverðar tilraunir í leit okkar að sniðugum húsráðum.
Eitt það snjallasta sem við höfum rekist á var Excel-skjal sem húsbændur geymdu samviskusamlega framan á frystinum sem innihélt nákvæman lista yfir það sem í frystinum var og hvar það var að finna – í kistunni.
Annað ráð sem við ætlum að gefa ykkur hér er í senn sniðugt og getur margfaldað plássið í frystinum á svo einfaldan hátt að þið hugsið sjálfsagt með ykkur „af hverju í ósköpunum datt mér þetta ekki í hug?“.
Þetta er einfalt og felur í sér að hengja poka upp á grindunum sem er að finna í flestum frystum með skjalaklemmu. Mikilvægt er að lofttæma pokana eins og allt annað sem fer inn í frysti og svo eru þeir bara hengdir upp eftir kúnstarinnar reglum og teknir úr þegar þörf er á.
Einfalt og afskaplega sniðugt.