Matur | mbl | 24.3.2017 | 15:00

Krans sem bætir sjónina og frjósemina

Þetta er mynd af gulrótarkransi en þó ekki alveg sömu uppskrift og hér er að finna. Ljósmynd / Food 52

Það heitasta heitt í dag er áttundi áratugurinn samkvæmt nýjustu fregnum frá höfuðborg hátískunnar og því má eðlilega leiða líkur að því að gómsætar dásemdir áttunda áratugarins muni eiga feiknarsterka endurkomu í eldhús landsmanna á komandi vikum og mánuðum.

Við erum að sjálfsögðu alltaf leiðandi í nýjustu matartrendunum og því ákváðum við að deila með ykkur þessari eðaluppskrift að gulrótarkransi. Hann er sérlega karoten-auðugur og bragðast vel með skinku.

Fyrir þá sem eru ekki að kveikja hvaðan þessi snilld er upprunnin þá er hana að finna í meistarabókinni Ódýrt og gott sem kom út árið 1984 og naut mikilla vinsælda hér á landi. Við grátbiðjum hugaða um að elda þennan rétt og deila myndum inn á Instagram með myllumerkinu #matur.a.mbl.

Gulrótakrans

400 gr. gulrætur
½ laukur
3 msk. smjör
2 egg
1 msk. hvieti
1 ½ dl mjólk
½ tsk. salt
¼ tsk. hvítur pipar

Fylling

Djúpfryst rósakál

Aðferð

Flysjið gulræturnar og sjóðið þær þar til þær hafa aðeins náð að mýkjast í léttsöltu vatni. Rífið þær síðan niður. Þetta ættu að verða um 4 dl af gulrótum.
Flysjið og saxið laukinn. Bræðið feitina og þeytið eggin. Blandið öllu saman í skál ásamt hveiti, mjólk, salti og pipar.
Hellið blöndunni síðan í vel smurt form og bakið hana í 225 gráðu heitum ofni í um 30 mínútur.
Sjóðið rósakálið eins og ráðlagt er á pakkanum. Raðið því í kransinn miðjan. Í stað rósakáls má nota lauk í steinseljusósu eða smjörsteikta sveppi.
Berið réttinn fram einan og sér eða með þunnskornu kjöti eins og skinku.