Prestmaddaman á Dalvík æsispennt

Prestmaddaman á Dalvík er með skemmtilegri konum á landinu og þótt víðar væri leitað. Hún er betur þekkt sem leikkonan Margrét Sverrisdóttir sem meðal annars stýrði Stundinni okkar af sinni alkunnu snilld sem Skotta. Margrét er gift Séra Oddi Bjarna Þorkelssyni og stýra þau hjónin sókninni af miklum myndarbrag. Margrét er jafnframt afskaplega hrifin af vöfflum og fagnaði hún óspart þegar hún komst að því að til var heill dagur tileinkaður vöfflum og hyggst hún halda hann hátíðlegan eins og henni einni er lagið.

„Ég var bara að uppgötva þennan frábæra dag í dag og er staðráðin í að halda upp á hann með því að gera heilan bing af belgískum vöfflum, segir Margrét og bætir því við að best væri að baka þær snemma og borða fyrst svona um kl. 11 með beikoni, banönum og sírópi. „Svo með kaffinu væri best að hafa rabbarbarasultu frá mömmu og þeyttan rjóma með. Það er reyndar líka gott að hafa alls konar ávexti líka en sultan og rjóminn standa alltaf fyrir sínu.“

Hún segist finna hvernig spennan magnast við það eitt að tala um vöfflurnar og má búast við að það verði mikil gleði á prestsetrinu á Alþjóðlega vöffludeginum sem haldinn er hátíðlegur í dag, 25. mars.

• Blogga um frétt