Það er alltaf eitthvað svo hlýlegt að koma í Norræna húsið. Í gamla daga var algengt að skreppa þangað á myndlistarsýningu, lesa norræn blöð, fá sér jafnvel kakó og vöfflu og horfa yfir Vatnsmýrina með öllu sínu fuglalífi. Í dag má finna þar veitingastaðinn AALTO Bistro sem tekur á móti gestum í hádegismat, síðdegiskaffi alla daga vikunnar, og kvöldmat allt að fjögur kvöld í viku. Innanstokksmunir sem langflestir eru eftir hinn finnska heimsfræga arkitekt hússins, Alvar Aalto, hafa lítið breyst í áratugi og sami notalegi andinn er þar enn í dag. Veitingastaðurinn heitir í höfuðið á honum til að heiðra einstaka arfleifð hans í Vatnsmýrinni. „Við fáum stundum fólk sem kemur í kaffi og er í smá nostalgíukasti,“ segir Sveinn og bætir við að stemningin sé dálítið eins og að vera í sveitinni.

„Svo er gríðarlegt fuglalíf hér og þó að þú sért með Hringbrautina nálægt þá ertu samt kominn út í sveit.“

Krafa um vegan-rétti

Sveinn segir nóg að gera en viðskiptavinir eru blanda af erlendum ferðamönnum og Íslendingum. „Við erum að reyna að gera öllum til hæfis og erum til dæmis með jafn marga kjöt-, fisk- og vegan-rétti á matseðlinum,“ segir Sveinn og segir að fólk í dag gerir kröfur um að hægt sé að fá vegan-rétti. „Það er skemmtileg nýjung að vera með marga vegan-rétti og heldur manni vakandi,“ segir hann.

„Við förum okkar eigin leiðir í að nálgast hráefni og verslum mikið við smáframleiðendur, bæði í fiski og grænmeti,“ segir Sveinn. „Við erum líka með gróðurhús á sumrin þar sem við ræktum okkar eigin kryddjurtir og smámatjurtagarð þar sem við ræktum grænmeti.“

Matarmenningar mætast

Maturinn byggist á norrænum grunni með Miðjarðarhafsútfærslu. „Þegar ég tala um norrænan grunn er ég alveg eins að horfa til norrænna innflytjenda af þriðju kynslóð. Ég leyfi mér að nota margt frá innflytjendum í matargerð sem hefur farið bakaleiðina inn í matarmenninguna,“ segir Sveinn en hann bjó lengi í Noregi sem ungur maður. „Þar kynntist ég fleiri Tyrkjum og Marokkóbúum en Norðmönnum. Svo hef ég búið lengi í Hollandi og fundið sterkt fyrir því hvernig matarmenningin mætist og verður hluti af menningu þess lands. Aðlagast mjúklega,“ útskýrir Sveinn.

Skelfiskrétturinn alltaf góður

Maturinn sem Sveinn ber á borð fyrir blaðamann virðist bæði ferskur og hollur. „Við reynum að hafa „healthy food for happy hearts“. Við viljum hafa matinn hreinan en við notum samt alveg smjör, rjóma og vín í matargerðinni. En við erum ekki að djúpsteikja neitt og erum meðvituð í matreiðslunni.“

Spurður um sinn uppáhaldsrétt að elda segir Sveinn að það sé misjafnt. „Ég er svo mikill dellukarl að það kemur alltaf nýr og nýr réttur. En ég er búinn að elda þennan skelfiskrétt sem hér er uppskrift af lon og don, alla tíð í mörgum löndum.“