IKEA-hjól og rauðvínstöskur sprengja hjólatískuna

Hjólreiðamenningin hér á landi hefur umpólast á undanförnum árum og nú finnst vart maður sem ekki getur státað af góðu hjóli. Þrátt fyrir að keppnishjól séu gríðarlega vinsæl hafa götuhjólin líka notið mikilla vinsælda og fátt þykir flottara en að hjóla um með hlaðna körfu og baquette-brauð á bögglaberanum.

IKEA kynnti á dögunum SLADDA-hjólið sem verður að viðurkennast að er algjör snilld. Hjólið er huggulegt borgarhjól sem hægt er að raða aukahlutum á. Stærsta fréttin er þó sjálfsagt hjólavagninn en slíkir vagnar eru sérlega heppilegir fyrir þá sem aðhyllast bíllausan lífstíl.

Aukahlutalínan er líka nokkuð góð og hægt er að fá körfur og bögglabera, auk hjólatösku sem breytist í bakpoka.

Nokkuð veglegt úrval en við mælum þó að sjálfsögðu með að IKEA bæti í og þrói almennilegan rauðvíns-haldara og baquette-statíf en slíkir aukahlutir njóta mikilla vinsælda og þykja hið mesta þarfaþing.

Reiðhjólaverslunin Berlín selur ákaflega lekkeran rauðvínshaldara en eins og sjá má á þessum myndum er þetta klárlega punkturinn yfir i-ið. Glasahaldarann og baquette-statíf þarf þó að panta erlendis frá.

Við minnum þó á að ólöglegt er að hjóla undir áhrifum áfengis en í 6. mgr. 45. gr. umferðarlaga nr. 50/1987 er svohljóðandi ákvæði:

Enginn má hjóla eða reyna að hjóla eða stjórna eða reyna að stjórna hesti, ef hann er undir svo miklum áhrifum áfengis eða annarra örvandi eða deyfandi efna, að hann geti eigi stjórnað hjólinu eða hestinum örugglega.