Sushi-burrító skyndibitaæðið er komið í Höfðatorg

Unnur Pálsdóttir betur þekkt sem Lukka á Happ opnaði nýjan veitingastað á dögunum ásamt eiginmanni sínum Magnúsi Stefánssyni og hjónunum Karli Guðmundssyni og Emilíu Borgþórsdóttur. „Við erum tvenn hjón sem eigum SuBu saman en Emilía er framkvæmdastjóri og stýrir daglegum rekstri staðarins,“ segir Lukka sem rekur hinn vinsæla heilsustað Happ beint á móti SuBu í Höfðatorgi. En hvað er Subu?

„Subu er sushi og burritó í einum og sama réttinum. ​Sushi-Burrito hóf sigurgöngu sína í San Francisco í kringum 2011. Þar komu saman tveir af uppáhaldsréttum svæðisins í valkosti sem var hvorki hin dýra og tímafreka sushi-máltíð né hin afar ódýra en hentuga burritó-rúlla,“ segir Lukka sem bendir á að sushi-burritó-staðir séu einna vinsælustu hádegisverðarstaðirnir í San Fransisco og eru iðulega langar biðraðir. „Einnig má finna örfáa slíka staði í mörgum stærstu borgum Bandaríkjanna líkt og New York og Los Angeles en langt í frá alls staðar. Staðirnir eru að detta inn í London, Berlín...og nú í Höfðatorgi!“ segir Lukka og er handviss um að sushi-búrrító sé næsta skyndibitaæðið hérlendis.