Það er alltaf gaman að fara í Góða hirðinn enda rekst maður yfirleitt á einhverjar dásemdir sem hafa legið gleymdar og grafnar í kössum um árabil. Matarvefurinn gerði góða ferð þangað í gær og rakst á ýmislegt sem telst býsna áhugavert og flokkast sem hönnun eða sígildir gripir.
Við rákumst líka á ýmislegt annað og sumir urðu kaupgleðinni að bráð en við nefnum engin nöfn.
Hér gefur að líta það sem okkur þótti standa upp úr:
Það heitasta heitt þessa dagana er hönnunardúóið HAF og þessi diskur er úr smiðju þeirra og kostar aðeins 450 krónur. Til voru fimm slík stykki.
Þessi forláta koparkaffikanna er glettilega lík Stelton-könnunum frægu. Hún var föl fyrir lítinn pening og myndi sóma sér vel í hvaða eldhúsi sem er.
Danskir hönnunargripir eru sígildir og Holmengaard stendur alltaf fyrir sínu. Að sögn heimildarmanna Matarvefjarins í Góða hirðinum rata slíkar gersemar reglulega þangað inn.
Það er mikið úrval af Ritzenhoff-glösum til sölu en þau fást í Casa og kosta fullt af peningum. Glösin eru mikið stofustáss og í miklu uppáhaldi hjá mörgum.
Hægt er að rekast á alls konar sniðugt tekk eins og þessa fallegu bakka sem myndu sóma sér vel á hvaða heimili sem er.
Þessi forláta diskur var gefinn út í fyrra til að fagna 100 ára afmæli Fóstbræðra. Búast má við að slegist verði um gripina eftir nokkur ár.
Á hverju ári heldur Klúbbur matreiðslumeistara hátíðarkvöldverð þar sem fínasta fólk landsins kemur saman. Gefinn er út diskur ár hvert og þetta er 2003-týpan. Forláta diskur sem einungis var framleiddur í nokkur hundruð eintökum. Nokkrir árgangar til.