Hvar er best að geyma matreiðslubækurnar?

Matreiðslubækur eru snúið fyrirbæri. Þær eru bráðnauðsynlegar og því gott að hafa við höndina. Þær eru oftast ákaflega lystaukandi þannig að það má færa sannfærandi rök fyrir því að það sé stórhættulegt að hafa þær alltaf fyrir augum og svo eru þær úr pappír þannig að það er harðbannað að hafa þær of nálægt eldavélinni eða úti í glugga.

Það er líka fremur grátlegt að hafa þær of fjarri eldhúsinu en hvað er þá til ráða? Svarið hér er að hætta að pæla of mikið í því sem hér stendur og hafa bara bækurnar þar sem þú vilt. Sumir eru meira að segja á því að matreiðslubækur séu hin mesta heimilisprýði og við tökum undir það. Því tókum við saman nokkrar hugmyndir fyrir ykkur en til að svara spurningunni hér að ofan þá skyldi aldrei geyma matreiðslubækur of nálægt eldavélinni (þá drekka þær í sig fitu og eyðileggjast) eða úti í glugga (þá upplitast þær – sem er svo sem allt í lagi en verið alla vega meðvituð um þetta).