Nýjar míní-Kitchenaidvélar vinsælar

Kitchenaid-vélarnar hafa hingað til fengist hérlendis í hefðbundnum heimilisútgáfum sem eru með 300 W mótor og 4,8 lítra skál og iðnaðarútgáfu sem er mun stærri og helst notuð á veitingahúsum og í fyrirtækjum. 

Rafland tók nýverið í sölu svokallaðar míní-vélar sem eru mun nettari en þær hefðbundnu og eru hugsaðar fyrir minni rými. Skálarnar eru minni og rúma 3,3 lítra svo þær eru sniðugar fyrir lítil heimili eða þá sem gera minni skammta. Hin hefðbundna Kitchenaid Artisan er rúmlega 11 kíló en sú minni aðeins 6,5 kíló.

Matarvefurinn hafði samband við Rafland og spurði út í viðbrögðin við litlu vélunum. „Míní-hrærivélarnar hafa verið í sölu hjá okkur í um mánuð og áhuginn hefur verið mikill. Þær eru auðvitað aðeins ódýrari líka en Míní kosta 74.990,“ segir Dísa Sigurðardóttir, markaðsfulltrúi Raflands. 

Til að byrja með munu litlu vélarnar vera fáanlegar í heiðbláu, liljubleiku og svörtu. Af hinum hefðbundnu Artisan-vélum er helst að frétta að það er kominn nýr litur í verslanir hérlendis. Liturinn kallast Silk Pink og er fallega ljósbleikur með peruáferð.