Efri skápar eru alla jafna taldir bráðnauðsynlegir enda að finna í flestum eldhúsum. Þeir auka geymslurými í eldhúsinu sem getur komið sér vel þegar um lítil eldhús er að ræða. Einnig hefur verið vinsælt að vera með glerhurðir á skápum ætluðu leirtaui eða sparistellinu og til hátíðarbrigða er oft lýsing inn í slíkum skápum, sem kemur sérlega vel út, nema auðvitað þegar allt er í drasli.
Á síðustu misserum hafa opnar hillur notið mikilla vinsælda. Hillurnar létta á eldhúsinu og gera það virkilega smart þó að vissir ókostir fylgi þeim vissulega.
Svo er það þriðja útfærslan sem við erum lúmskt skotin í en það eru eldhús með engum efri skápum né hillum. Þetta gefur eldhúsinu allt annan blæ og þá er einnig vinsælt að hengja upp stórar myndir eða eitthvað sérdeilis ó-eldhúslegt.
Það gefur þó augaleið að þetta er einungis vænlegur kostur í stærri eldhúsum eða hjá fólki sem notar eldhúsið meira upp á skraut enda er töluvert af dóti sem þarf að komast fyrir í venjulegu eldhúsi. Hér gefur að líta nokkur eldhús sem öll eiga það sameiginlegt að vera sérlega vel heppnuð.