Garðbæingar geta glaðst yfir þessum börum

Ég á vinkonu sem býr í Garðabæ og segist oft sakna þess að búa ekki nær miðbænum til að geta stokkið út í einn drykk með okkur vinkonunum sem flestar búum í miðbænum. Hún hefur ítrekað reynt að lokka okkur í Garðabæinn með lofum um lostafengnar máltíðir og huggulega heimahrista kokteila. Kona þessi er nú svo stórskemmtileg að það þarf svo sem ekki meira en flatt sódavatn til að maður gerir sér utanbæjarferð til að hitta hana en nú eru svo sannarlega efni til.

Heimabaræðið mikla er nefnilega langt því frá að vera bara í smart tímaritum erlendis. Fjöldi verslana hefur hafið innflutning á fallegum heimabörum auk þess sem Facebook-sölugrúppur selja slíka notaða gripi á kostaverði. Hnötturinn gamli þykir einnig mikil klassík og eru ófáir afar gramir út í foreldra sína fyrir að hafa látið slíka gripi frá sér.

Til að gera langa sögu stutta hefur vinkonan lýst yfir vilja til þess að kaupa slíkan bar ef miðbæjarvinkonurnar lofi að lufsa sér reglulega til hennar. Það finnst mér gott tilboð!

Fyrir aðila í sömu stöðu gefur hér á að líta sérlega fagurt úrval heimabara frá 1.500 krónum og upp í aðrar og erfiðari upphæðir.