Senda inn efni
Alberto Aquilani leikur ekki á Emirates annað kvöld. Reuters
Aquilani úr leik hjá Liverpool
Rafael Benítez, knattspyrnustjóri Liverpool, sagði í dag að ítalski miðjumaðurinn Alberto Aquilani myndi missa af leik liðsins gegn Arsenal annað kvöld vegna veikinda.
„Hann liggur með ælupest og er ekki í standi til að vera í hópnum. Þetta er ekkert alvarlegt, Martin Skrtel lenti í þessu sama um helgina og léttist þá um fjögur kíló," sagði Benítez á fréttamannafundi á Anfield í dag.
Sotirios Kyrgiakos, gríski miðvörðurinn, verður heldur ekki með en hann hefur afplánun þriggja leikja banns eftir að hafa verið rekinn af velli gegn Everton um helgina. Þeir Fernando Torres, Yossi Benayoun og Glen Johnson eru áfram frá keppni vegna meiðsla en Benítez sagði að allir væru á góðri leið og yrðu leikfærir eftir 2-3 vikur.
Hann var m.a. spurður um hvort marokkóski framherjinn Marouane Chamakh myndi koma til félagsins frá Bordeaux í sumar. „Ég held að hann komi ekki til okkar," svaraði Benítez og vildi ekki ræða það frekar en Chamakh hefur sjálfur lýst því yfir að hann vilji frekar ganga til liðs við Arsenal.
Til baka