Óstaðfestar fregnir herma að hin nýskilda Jessica Simpson muni fá gestahlutverk í sjónvarpsþáttunum Aðþrengdar eiginkonur. Haft er eftir innanbúðarmanni að rætt sé um að hún komi fram í einum þætti eða tveim. Jessica, sem nýlega skildi við Nick Lachey, sást fyrir skömmu á veitingastað í Los Angeles með Evu Longoriu, sem leikur eitt aðalhlutverkið í þáttunum.
Framleiðendur þáttanna hafa hingað til neitað því staðfastlega að Jessica komi til greina í gestahlutverk. Fyrr í vikunni bárust af því fregnir að hún væri enn „viðkvæm“ vegna skilnaðarins, en væri sannfærð um að það hafi verið rétt ákvörðun að skilja.