Litlu mátti muna að Teri Hatcher missti sjónina á öðru auganu er hún var við tökur á Aðþrengdum eiginkonum þegar ljósapera sprakk og brot úr henni lenti í auga Hatchers, sem var flutt á sjúkrahús í skyndi.
Nú skartar hún lepp fyrir hægra auga á meðan sárin gróa, en þrátt fyrir það hefur hún verið dugleg við að horfa á björtu hliðina og segir góðu fréttirnar vera þær, að hornhimnan í auganu sé fljótari að gróa en nokkur annar vefur í líkamanum.
Hatcher er 42 ára. Hún fer með hlutverk Susan Mayers í þáttunum. Brotið úr ljósaperunni rispaði hornhimnuna, og Hatcher segir að þótt hún finni svolítið til hafi hún reynt að sjá húmorinn í því hvað þetta sé alltsaman skringilegt. „Það var farið með mig til yndislegs læknis og núna er ég með glæsilegan lepp. Þetta var engum að kenna.“