Mikil örtröð var fyrir utan verslun Og Vodafone við Síðumúla í Reykjavík þegar forsala aðgöngumiða á afmælistónleika Bubba Morthens hófst klukkan 10 í morgun. Talið er að tæplega 100 manns hafi beðið fyrir utan verslunina þegar verslunin opnaði. Miðað við þann fjölda sem bíður eftir miðum má gera ráð fyrir að miðar í stúku klárist í dag. Rúmlega 5.000 miðar eru í boði í heild sinni. Almenn miðasala hefst á mánudaginn í verslunum Og Vodafone og á vefsíðu fyrirtækisins.
Á afmælistónleikunum sem eru í tilefni af 50 ára afmæli Bubba, sem eru 6. júní, mun tónlistarmaðurinn líta yfir farinn veg að flytja tónlist frá öllum sínum ferli undanfarin 26 ár. Á þriðja tug tónlistarmanna koma fram með Bubba á tónleikunum. Meðal hljómsveita sem koma fram á tónleikunum með Bubba eru: Utangarðsmenn, Egó, GCD, Das Kapital og fleiri.