Þjófur einn sem stal aðgangsmiða að leik Brasilíumanna og Ástrala á HM í knattspyrnu í gær úr veski konu nokkurrar, var gripinn glóðvolgur þegar hann settist við hlið eiginmanns hennar. Eiginmaðurinn lét öryggisverði vita af manninum sem sat í sæti konunnar og var þjófurinn handtekinn skömmu síðar.
Talsmaður lögreglunnar í München, þar sem leikurinn fór fram, segir þjófinn ekki hafa átt von á því að eiginmaðurinn myndi sitja í næsta sæti. Ananova fréttavefurinn segir af þjófinum grandalausa.