Áhættuleikkona ein í Bretlandi greip til þess ráðs að þekja sig 50 hungruðum rottum til þess að vekja athygli á vaxandi rottuplágu í landinu. Að sögn samtakanna Keep Britain Tidy eru nú 60 milljónir rotta í landinu, þ.e. ein rotta á hvern íbúa. Rottugjörningurinn fór fram á Golden Square torginu í Westminster í Lundúnum í dag, en hann er hluti herferðar sem á að fá fólk til að henda ekki mat á götu í landinu.
Konan sem framdi gjörninginn fór ofan í plexíglerskassa sem var fullur af mat og rottunum var síðan bætt við. Að sögn Keep Britain Tidy eru um 15 milljónir manna í landinu sem henda matarleifum frá sér á víðavangi, einkum á gangstéttir í hádegishléum. Sky fréttavefurinn segir frá þessu.