Tvö svín gengu í það heilaga í litlum bæ í Taívan í dag við hátíðlega athöfn og voru hundruð manna viðstödd athöfnina. Það var dómari í bænum sem vígði brúðhjónin. Eigandi galtarins, Hsu Wen-chuan, segir svínin eiga farsæla framtíð fyrir höndum.
Parið var síðan blessað af kaþólskum presti í þorpinu og voru 400 gestir viðstaddir. Hver þeirra færði brúðhjónunum 100 taívanska dollara, um 200 krónur, en féð verður notað í kaup á sendiferðabíl fyrir kirkjustofnun sem aðstoðar fötluð börn. Ár svínsins hefst 18. febrúar.