Harðskafi eftir Arnald Indriðason seldist mest allra bóka á síðasta ári samkvæmt samantekt Félagsvísindastofnunar Háskóla Íslands sem birt er í Morgunblaðinu í dag.
Samkvæmt upplýsingum frá útgefanda bókarinnar, Forlaginu, er Harðskafi mest selda frumútgáfa af íslenskri skáldsögu en hún seldist í tæpum 30 þúsund eintökum á útgáfuárinu. Endanlegar sölutölur liggja þó ekki fyrir því að enn á eftir að taka saman skil á bókinni.
Ítalskir réttir Hagkaupa seldust næstmest allra bóka og Leyndarmálið eftir Rhondu Byrne er í þriðja sæti bóksölulistans. Sagan um Bíbí Ólafsdóttur eftir Vigdísi Grímsdóttur er í fjórða sæti og Þúsund bjartar sólir eftir Khaled Hosseini í fimmta.
Sálmabók íslensku kirkjunnar var mest selda ljóðabókin, eins og í fyrra, og Harry Potter og dauðadjásnin var mest selda barna- og unglingabókin.