Þótt plötuútgáfa sé orðin nokkuð jöfn yfir árið er málum enn svo háttað að helsta vertíð plötuútgáfu er síðustu mánuðina fyrir jól; þá kemur obbinn af útgáfu ársins út og þá er salan aukinheldur mest.
Á undanförnum árum hefur íslensk tónlist sótt í sig veðrið samanborið við innflutta tónlist – 2002 var íslensk tónlist í fyrsta sinn í meirihluta af seldri tónlist hér á landi og á síðasta ári var svo komið að íslenskar plötur voru tveir þriðju af plötusölu hér. Flest bendir til þess að þetta bil eigi enn eftir að aukast á þessu ári, enda hefur sala á erlendri tónlist dregist saman um 20-30% á árinu samkvæmt heimildum Morgunblaðsins, en aftur á móti er sala á íslenskri tónlist á góðu róli.
Að sögn Ásmundar er greinilegur samdráttur í sölu á erlendri tónlist og þar sé ýmsu um að kenna, til að mynda hafi útgáfumynstur breyst erlendis og ekki síst hafi gengi krónunnar verið óhagstætt. „Gríðarlegar vinsældir plötunnar úr ABBA-myndinni Mamma Mia breyta þessari mynd reyndar talsvert, enda hafa selst af henni ríflega 10.000 eintök og þannig tölur hafa menn ekki séð í sölu á erlendri tónlist í mörg ár.“