Jónsi önnum kafinn við eigin verk og annarra

Eins og fram hefur komið kemur skífa þeirra Jóns Þórs Birgissonar, eða Jónsa, og Alex Somers út 20. júlí næstkomandi, en platan, sem ber heitið Riceboy Sleeps, verður gefin út undir nafninu Jónsi og Alex.

Jónsi er þó með meira í smíðum; hann lauk við upptökur á annarri breiðskífu fyrir stuttu, sem gefin verður út sem sólóverkefni hans síðar á árinu, en hljóðblöndun hennar stendur nú sem hæst. Í öllum þessum önnum hefur hann svo fundið sér tíma til að endurhljóðblanda lag með Depeche Mode sem verður á 7" útgáfu af næstu smáskífu sveitarinnar. Smáskífan verður með laginu „Peace“, en Jónsi vélaði um lagið „Come Back“.