„Við erum í viðræðum við fjölda stórra dreifingaraðila en við erum ekki búnir að ákveða ennþá hverja við semjum við. Viðræður eru samt langt komnar og þetta kemur í ljós fljótlega,“ segir Júlíus Kemp kvikmyndagerðarmaður sem er með myndina Reykjavík Whale Watching Massacre á kvikmyndahátíðinni í Cannes.
Myndinni var tryggð íslensk dreifing í Cannes í fyrradag þegar Júlíus, Ingvar Þórðarson og Gísli Gíslason gengu frá dreifingarsamningi við Árna Samúelsson í Sambíóunum. „Hún verður frumsýnd á Íslandi 09.09.09 og ætla Sambíóin bæði að vera með hana á stafrænu formi og á filmu,“ segir Júlíus og bætir við að það hafi verið gott að nýta tímann í Cannes og tryggja íslenska dreifingu.
Reykjavík Whale Watching Massacre hefur verið vel tekið í Cannes og verður Júlíus var við mikla eftirvæntingu. „Við byrjuðum á því að sýna úr henni í janúar á Gautaborgarhátíðinni og það hefur myndast nokkuð gott orðspor í kringum hana eftir það, þó þetta sé stór heimur er hann ansi lítill líka og það tala allir saman. Menn vita af myndinni og eru spenntir.“