Kvikmyndamiðstöð Íslands er sem fyrr með opinn kynningarbás fyrir íslenskar kvikmyndir og kvikmyndagerð í Cannes. Að sögn Laufeyjar Guðjónsdóttur, forstöðumanns miðstöðvarinnar, hefur áhugi erlendra kaupenda á íslensku myndunum verið töluverður, og kannski ekki síst á Reykjavík Whale Watching Massacre.
„Svo hefur talsvert verið spurst fyrir um A Good Heart Dags Kára, sem og Draumalandið og Sólskinsdrenginn,“ segir Laufey en segir ekki búið að ganga formlega frá neinum samningum um kaup á myndunum erlendis.
Það eru þó ekki bara bíómyndirnar sem starfsfólk Kvikmyndamiðstöðvar þarf að svara fyrir því Laufey segir þau vera talsvert spurð út í efnahagshrunið á Íslandi.