Andri Snær Magnason rithöfundur tók við Kairos verðlaununum í Hamborg í Þýskalandi í gær. Athöfnin sjálf, sem helguð er verðlaunahafanum og verkum hans, fór fram í Borgarleikhúsinu í Hamborg að viðstöddum 1.200 gestum. Fram komu m.a. Emilíana Torrini, Pétur Hallgrímsson, Steindór Andersen, Páll frá Húsafelli og Hilmar Örn Hilmarsson.
Segir í fréttatilkynningu frá Forlaginu að víða hafi verið fjallað um verðlaunaafhendinguna í evrópskum fjölmiðlum í gær.
Stofnun kennd við Alfred Toepfer veitir verðlaun þessi árlega og nemur verðlaunaféð 75.000 evrum, 13 milljónir króna. Stofnunin hefur styrkt og verðlaunað listamenn í Þýskalandi allt frá árinu 1931.
Kvikmynd sem gerð var eftir bók Andra Snæs, Draumalandið, var valin heimildamynd ársins á Edduverðlaunahátíðinni á laugardagskvöldið.