„Þetta hefur verið lærdómsríkt verkefni og gaman að vera meðal þátttakenda,“ segir Klara Lind Gylfadóttir.
Eins og sagt var frá í Morgunblaðinu á dögunum lauk hún stúdentsprófi frá Menntaskólanum Hraðbraut á dögunum, aðeins sextán ára gömul, og hyggst hefja nám í jarðfræði við Háskóla Íslands í haust.
Það var einmitt þess vegna sem fulltrúar þýsku sjónvarpsstöðvarinnar Arte sem er með höfuðstöðvar sínar í Berlín leituðu til Klöru Lindar sem viðmælanda, en þeir hafa verið hér á landi síðustu vikur vegna gerðar sjónvarpsþáttar um jarðfræði Íslands og mannlíf við rætur Eyjafjallajökuls og Kötlu, að því er fram kemur í Morgunblaðinu í dag.