Við ráðum mun meiru um eigin líf en við teljum okkur almennt trú um. Við getum nefnilega alltaf ráðið viðhorfum okkar og það hefur sýnt sig að viðhorfi er hægt að breyta á innan við mínútu, meðal annars með því að minna fólk á eitthvað fyndið atvik eða djúpa tilfinningu sem veitti því vellíðan og þá fyllist það gleði. Á sama hátt og hægt er að fara inn í sorgina með því einu að minna á hana. Við getum valið hvaða minningu við viljum dvelja við og þar með ráðið svo miklu um andlegt ástand okkar.

En af hverju er ég að spá í þetta núna? Jú, vegna þess að eitt af því sem við getum valið að gera er að setja okkur markmið. Mörgum finnst það hallærislegt að skrifa niður einhverja stefnuyfirlýsingu um það hvernig þeir óski að árið þeirra verði, en kannski er mun hallærislegra að gera það ekki. Ég man að ég átti að eins í vandræðum með þetta þegar ég setti mér fyrst niðurskrifuð markmið árið 1985, en hvatinn til þess var að ég eignaðist minn fyrsta Time Manager. Ég komst fljótt yfir þá tilfinningu, þegar ég sá hversu árangursríkt það var að skrifa þau niður og ekki síður, hversu gaman það var að strika þau út þegar þeim var náð.

Án markmiða eða stefnu í lífinu erum við á vissan hátt eins og stjórnlaust skip sem berst undan veðri og vindum. Með markmiðum veljum við að stjórna eigin lífi að svo miklu leyti sem við getum, því auðvitað geta óvæntir utanaðkomandi þættir líka haft áhrif. Stundum vitum við ekki hvernig markmiðin eiga að rætast þegar við skrifum þau niður. Þannig var það eitt sinn þegar ég var nýflutt að Hellnum. Við vorum fjögur að vinna saman og á nýársdag skrifuðum við niður tuttugu og þrjú markmið sem sneru að rekstri okkar, án þess að hafa hugmynd um hvernig við myndum fjármagna nema hluta þeirra. Við lok sama árs höfðum við náð tuttugu og einu af þessum tuttugu og þremur markmiðum.

Við erum alltaf að velja og eitt af því sem ég hef valið að gera er að beina sjónum að því að auka lífsgæði mín með því að viðhalda sem bestri heilsu, sem lengst. Á námskeiðum mínum og í samræðum við aðra, nú síðast í gær, heyri ég fólk oft segja að það eigi nú ýmis bætiefni uppi í skáp, en sé ekki byrjað að nota þau. Það er val. Og markmiðið hjá þessu fólki gæti verið að opna umbúðirnar og byrja að nota innihaldið, því það gerir líkamanum ekkert gagn uppi í skáp.

Markmiðin þurfa ekki að vera mögnuð eða stór, því þau smáu eru oft mun áhrifameiri en þau stóru. Stundum þarf einfaldlega að setja sér þau markmið að fá nægan svefn, taka reglulega inn  bætiefni, beina sjónum að hollu mataræði og hreyfa sig reglulega. Þótt þetta virðist smávægileg markmið hjá því að klífa hæstu tinda heims eða sigla yfir úthöfin, gætu þetta verið markmið sem skiptu heilsu þína og vellíðan mestu máli.

Settu þér endilega einhver markmið, að hverju sem þau nú snúa. Það er alltaf svo hvetjandi að gera slíkt í upphafi árs - skoða svo listann reglulega til að tryggja að stefnunni sé haldið - og meta svo í lok árs hversu árangursríkt árið hefur verið, líkt og við gerum með rekstur fyrirtækja og stofnana.