Margir tóku sig til og hófu að vinna að markmiðum sínum strax 1. janúar, en aðrir setja markið við 6. eða 7. janúar, þegar öllu jólahaldi er lokið. Hvort heldur sem er, þá er mikilvægt að gera sér grein fyrir því að ef þú ætlar að ná árangri með markmiðin þín, ræðst árangur ársins að miklu af því hvað þú gerir fyrstu 30 daga ársins - eða fyrstu 30 dagana eftir að þú ákveður að byrja að vinna að nýjum markmiðum.

Við setjum markmiðin yfirleitt vegna þess að við viljum gera einhverjar breytingar. Ef þú vilt ekki að þetta ár verði endurtekning á því síðasta - þarftu að byrja strax að venja þig á nýja valkosti og losa þig við gömul vanamynstur.

Munkurinn sem seldi sportbílinn sinn, eða öllu heldur höfundur bókarinnar, Robin Sharma er með nokkur góð ráð í þessu tilviki. Hann hvetur fólk til að byrja NÚNA, því ef ekki NÚNA þá hvenær, á að temja sér eftirfarandi:

1. Farðu daglega yfir markmiðin þín. Við lifum á tímum mikils hávaða og truflana. Því er svo auðvelt að hefja fyrstu vikur nýja ársins á því að elta ranga hluti. Vaknaðu aðeins fyrr á morgnana - og meðan aðrir sofa - taktu þér þá rólegar fimm mínútur til að lesa og hugsanlega endurskrifa fimm mikilvægustu markmið þín fyrir árið 2014. Þetta mun efla einbeytingu þína í að ná þeim og stimpla þau skýrt inn í undirvitund þína.
2. Hættu að kvarta. Þú eflir allt sem þú kvartar yfir. Þú magnar upp allt það neikvæða sem þú talar um, þar með talið þau vandamál sem þú talar mikið um. Til að tryggja að þú náir markmiðum þínum árið 2014, farðu þá í "90 daga kvartanalausa kúrinn". Látum þetta duga.
3. Taktu til hjá þér. Þeir sem ná mestum árangri eru þeir sem eru með minnst í kringum sig. Óreiða veldur truflun og truflanir draga úr orku þinni til að ná hvaða markmiði sem þú setur þér. Ruslaraleg skrifstofa, heimili sem er í óreiðu, fjárhagsleg óreiða og hugur sem er ofhlaðinn áhyggjum - allt dregur þetta úr getu þinni tl að beina fullri einbeitingu að því að láta drauma þína rætast.
4. Taktu smáu skrefin. Þegar allt kemur til alls þá munu 5 lítil markmið á dag, leiða til þess að þú hafir náð 1850 markmiðum þegar kemur að 31. desember 2014. Frábært starfs- og einkalíf felst meira í framþróun en byltingu. Leggðu þig því fram um að ná litlu sigrunum og þeir stóru munu fylgja á eftir.

Heimildir: Úr fréttabréfi Robin Sharma - sjá www.robinsharma.com
Mynd: Keypt af vef Pixmac