Apríl er runninn upp og þennan fyrsta dag eru margir á fullu að leita leiða til að narra náungann með einhverju vel upphugsuðu gabbi. Aðrir beina sjónum að náttúrunni og umhverfinu, því í dag hefst vitundarátakið GRÆNN APRÍL, þetta árið í samstarfi við GRÆNA DAGA í Háskóla Íslands.

Fyrir GRÆNUM DÖGUM í Háskólanum stendur Gaia, félag meistaranema í auðlinda- og umhverfisfræðum. Þau hafa sett upp veglega dagskrá sem stendur frá deginum í dag og fram á 5. apríl, þar sem fjallað verður um ýmsa þætti sjálfbærni  og  umhverfisverndar en dagarnir verða formlega settir á Háskólatorgi kl. 12 á hádegi í dag.

FKA Félag kvenna í atvinnulífinu stendur fyrir morgunfundi 2. april þar sem fjallað er um það hvernig græða má á grænum viðskiptum. Gaman er að sjá að sá þankagangur er farinn að öðlast fylgi innan félagsins.

Alþjóðlegur dagur jarðar er 22. apríl. Víða erlendis standa áhugamannafélög um umhverfisvernd fyrir ýmis konar hátíðahöldum á þessum degi, en því miður hefur slíkt ekki náð að festa sig í sessi hér á landi.

GRÆNN APRÍL mun halda vitundarátaki sínu gangandi í gegnum mánuðinn meðal annars með grænum pistlum hér í Smartlandinu. Hugsunin á bak við GRÆNAN APRÍL hefur alltaf verið sú að hvetja þá sem eru að selja vöru, þekkingu og þjónustu sem er græn og umhverfisvæn til að kynna hana fyrir neytendum í þessum mánuði, svo þeir geti í framtíðinni valið grænni kostinn.

Nýjasta loftslagsskýrsla Sameinuðu þjóðanna málar svarta mynd af framtíð heimsins. Ljóst er að við höfum farið fram yfir þau mörk að hægt sé að endurheimta eða snúa ferlinu við, en ALLT sem við gerum til að minnka skaðann mun hafa áhrif. Hver og einn er ábyrgur fyrir sínum gjörðum, svo hvatning mín til allra er að gera ekki bara apríl grænni, heldur alla mánuðið ársins.

Hlekkur á GRÆNA DAGA
Hlekkur á GRÆNAN APRÍL
Hlekkur á frétt um loftslagsskýrsluna