Erlendur samstarfsfélagi minn er í sinni fyrstu heimsókn á Íslandi og ég ákvað að sýna honum smá af landinu. Stefnan var tekin að Gullfoss og Geysi í gær. Þetta er í fyrsta sinn sem ég greiði aðgangseyri að Geysi og ég ákvað að geyma miðann til minningar. Ég hef nefnilega verið ötull talsmaður þess, allt frá því ég fór að starfa í ferðaþjónustu árið 1996, að við ættum að taka gjald við helstu ferðamannastaði okkar til að geta fjármagnað framkvæmdir og uppbyggingu þar. Ég hef ferðast mjög víða og man ekki eftir að hafa komið í nokkuð land þar sem ég greiddi ekki aðgang t.d. að þjóðgarði.

Inni á veitingastaðnum í þjónustumiðstöðinni skoðaði ég teikningar sem sýna tillögur að uppbyggingu á svæðinu í kringum Geysi. Ljóst er að landeigendur vilja bæta aðstöðu ferðamanna mjög mikið á svæðinu og þær tillögur að breytingum sem hanga uppi eru mjög flottar.

Í gær rifjaðist upp fyrir mér að ég var þarna á ferð um sama svæði, á sama tíma árs, fyrir um 30 árum. Þá var þar ENGINN ferðamaður fyrir utan mig og samferðamenn mína. Engin kaffi- og veitingahús voru opin og ég þurfti að útbúa nesti fyrir alla í ferðinni áður en lagt var af stað. Í gær var á báðum stöðum mikill mannfjöldi í ótal einkabílum, sérútbúnum fjallabílum og mörgum rútum. Allt þetta fólk hafði gott aðgengi að salernum og veitingaþjónustu. Það gat líka keypt sér minjagripi í verslunum á báðum stöðun, en öll þessi þjónusta skiptir miklu máli, ekki bara fyrir ferðamanninn, heldur líka fyrir efnahag landins og hag þeirra sem á ferðamannasvæðum búa.

Við verðum að sætta okkur við þá staðreynd að aðsókn að ferðamannastöðum okkar hefur margfaldast og þótt ýmsar aðstæður til að taka á móti ferðamönnum hafi batnað, þarf að gera mun betur ef duga skal. Þeir peningar sem koma frá ríkissjóði til uppbyggingar ferðamannastaða hafa í gegnum tíðina verið afar takmarkaðir og því ljóst að ef vernda á landið og bæta jafnframt aðstöðu ferðamanna til að njóta gæða þess, þarf aukið fjármagn að koma til. Það kemur meðal annars í gegnum gjaldtöku.

Göngum vel um landið okkar í GRÆNUM APRÍL og kennum erlendum ferðamönnum að gera slíkt hið sama. Það var of mikið rusl á víðavangi við Gullfoss.