Dagur átta í HREIN detoxinu rann upp í morgun og ég ákvað að máltíð dagsins skyldi vera úr kjúklingi. Rétturinn er fyrir tvo, en þar sem ég er ein geymdi ég bara helming hans og nota í hádegismat á morgun. Ég notaði bringur frá Litlu Gulu Hænunni, sem fást í Lifandi markaði og uppskriftin er svona:

• 1/3 bolli villt hrísgrjón - fann þau í Kosti
• ½ bolli brún jasmín hrísgrjón
• kókosolía til eldunar (nota Biona)
• 2 litlar bein- og skinnlausar kjúklingabringur, skornar í ferninga
• 1 lítill laukur, smátt saxaður
• ½ mangó, skorið í ferninga (ég notaði reyndar heilt mangó)
• safi úr hálfri sítrónu
• 1 matskeið lífrænt hrísgrjónaedik frá Sanchi
• 1 matskeið kókossykur (fæst í heilsubúðum)
• salt og pipar eftir smekk
• góð klípa af sterkum piparflögum
• ¼ bolli fersk steinselja, smátt söxuð

Leiðbeiningar:
Látið grjónin liggja í bleyti í köldu vatni í a.m.k. klukkustund fyrir suðu. Skolið þau síðan með því að hella þeim í sigti og láta vatn renna yfir þau smá stund. Setjið grjónin í pott ásamt 2 bollum af köldu vatni og ½ teskeið af salti. Látið suðuna koma upp, lækkið hitann og látið sjóða í u.þ.b. 50 mínútur eða þar til allt vatnið er soðið upp.

Þegar suðutíminn er rétt hálfnaður er gott að byrja að skera bringurnar í litla bita. Hitið pönnu á miðlungshita og bræðið kókosolíu á henni. Þegar olían er orðin heit, setjið þá kjúklingabitana á pönnuna, kryddið með salti og pipar og steikið þá á annarri hlið í 5 mínútur og snúið svo til að steikja hina hliðina. Bætið lauk út á pönnuna og látið steikjast í 2-3 mínútur eða þar til hann er aðeins brúnn. Bætið þá magnó, sítrónusafa, ediki, sterkum piparflögum og kókóssykrinum. Bætið hrísgrjónum í blönduna á pönnunni, svo og saxaðri steinselju. Berið strax fram.

Orkurík sem aldrei fyrr
Líkamleg líðan er góð og ég held áfram að vera í orkukasti, enda þótt ráðlagt sé að taka því aðeins rólega í HREIN detoxinu. Hef þó vissar hömlur á mér og allt gengur vel. Húðin í andlitinu er mun þéttari en hún var við upphaf afeitrunarferlisins, augnhrukkur mun grynnri og ég finn hvernig rennur af lærunum á mér. Allir verkir í handlegg horfnir og höfuðverkurinn sömuleiðis, en annað slagið kemur mikið slím úr ennis- og kinnholum. HREIN kúrinn er sem sagt að virka á fullu.