Ég er á níunda degi í HREIN detox-kúrnum mínum og verð að segja að þetta er einhver auðveldasti hreinsikúr sem ég hef farið í. Ég finn nánast aldrei fyrir svengd og ef sú tilfinning kemur upp, skoða ég hvort um sé að ræða vana eða hvort kalt vatn slökkvi á henni. Oft gerir vatnið það, enda tala margir um að við misskiljum oft þorstatilfinningu sem svengd.

Ég var vöknuð klukkan sex í morgun og borðaði ekkert fyrr en um áttaleytið til að halda 12 tíma glugganum frá kvöldverði (búst) í gær til morgunverðar (búst) í morgun matarlausum. Hins vegar svaraði ég þorsta líkamans með því að drekka rúmlega 1 ½ lítra af vatni áður en að morgunverði kom.

Þrjár máltíðir á dag virðast alveg vera málið, því ég var á fullu frá klukkan sex og fram til hádegis, til að ná að ljúka ákveðnu verkefni sem ég var með tímamörk á - og fann ekki augnablik fyrir þreytu, þótt verkefnið reyndi verulega á líkamlega.

Ég hef verið að bæta hvítlauk í bústið og matinn hjá mér, því ég rak allt í einu augun í að Dr. Alejandro Junger, höfundur bókarinnar leggur til að maður borði a.m.k. eitt rif á dag vegna bakteríudrepandi áhrifa hvítlauskins og ég hef ekki alveg verið að fara eftir því.

Mér finnst hins vegar hvítlaukurinn oft eyðileggjast hjá mér ef ég kaupi nokkra í einu, svo nú brá ég á það ráð að taka allan pokann, skipta laukunum upp í rif, afhýða hvert þeirra og setja í plastpoka sem ég setti svo í frysti. Nú á ég frosin hvítlauksrif í ísskápnum, líkt og ég á frosin ber og spínat, því þegar spínatið nálgast síðasta söludag skelli ég því bara í frysti. Og allt blandast þetta vel saman í nýja NutriBullet blandaranum mínum.