Borgaryfirvöld í Portland í Oregon-ríki í Bandaríkjunum hafa ákveðið að tæma 140 milljón lítra vatnsból bæjarins eftir að ungur piltur braust inn á svæðið og pissaði í vatnið. Þetta upplýsti forstöðumaður vatnsbólsins um í gær.
Öryggisvörður sem var að störfum við vatnsbólið á miðvikudaginn varð var við það í öryggismyndavél seint um kvöldið að ungur piltur sem stóð ásamt félögum sínum fyrir utan girðinguna sem umlykur vatnsbólið tók allt í einu upp á því að pissa í gegnum girðinguna og ofan í vatnsbólið. Annar félagi hans stökk yfir girðinguna og dýfði fætinum í vatnið. Lögreglan var kölluð á svæðið og tók hún skýrslu af mönnunum og fá þeir sekt fyrir að hafa brotist inn á lóðina. Ekki hefur verið ákveðið hvort þeir verða ákærðir fyrir alvarlegri brot.
„Jafnvel þótt við vitum að hættan af því að pissað sé í vatnsbólið sé lítil fyrir heilbrigði borgarbúa höfum við ákveðið að tæma bólið því við lítum á það sem okkar skyldu að sjá borgarbúum fyrir hreinu vatni,“ segir stjórnandi vatnsbólsins í samtali við Oregon Live.
Hér má sjá myndband úr öryggismyndavélum vatnsbólsins.