Evrópsk fyrirtæki farin að forðast fjárfestingar í Evrópu

Mörg stærstu og farsælustu fyrirtæki Evrópu eru í æ meiri mæli farin að beina viðskiptum sínum til Asíuríkja og til Bandaríkjanna vegna reglugerða Evrópusambandsins (ESB) samkvæmt skýrslu framkvæmdastjórnar ESB. Breska blaðið The Telegraph greinir frá þessu.

Fjárfestingar fyrirtækja í Evrópu þykja ekki nægar. Esko Aho, fyrrverandi forsætisráðherra Finnlands og höfundur skýrslunnar, segir að bregðast verði við þessu áður en það verði of seint. Bandaríkin, Kína og Japan eyða þar að auki meiru í rannsóknir og þróunarvinnu en Evrópa og breikkar bilið þar á milli sífellt meir.

Í skýrslunni kemur fram að ríkisstjórnir ESB-landa verði að grípa til aðgerða og verja meira fé til rannsókna og hætta að eyða opinberu fé í deyjandi iðngreinar.

Frétt Telegraph

mbl.is
Fleira áhugavert
Fleira áhugavert