Erlent | mbl | 8.6.2007 | 15:03

Giftingar barna bannaðar en umskurn kvenna leyfð

Konur úr Maasai ættflokknum hlusta á erindi um skaðsemi umskurnar kvenna í Kilgoris í Trans Mara í Kenýa. Reuters

Þing Afríkuríkisins Sierra Leone hefur sett ný barnaverndarlög þar sem giftingar barnungra stúlkna eru bannaðar. Í hinum nýju lögum er hins vegar ekki kveðið á um að umskurn stúlkna sé ólögleg í landinu líkt og í eldri lögum. Lágmarksgiftingaraldur stúlkna í landinu er nú átján ár en algengt mun vera að stúlkur allt niður í ellefu ára gamlar séu giftar eldri mönnum í landinu. Þetta kemur fram á fréttavef BBC.

Það vakti athygli að umræða þingsins um umskurn kvenna var lokuð fjölmiðlum og almenningi. Um 90% kvenna í landinu eru umskornar og segir þingmaðurinn Alassan Fofana það hafa verið einróma ákvörðun þingsins að taka umrætt ákvæði út úr lögunum.

Fulltrúi Barnahjálpar Sameinuðu þjóðanna í landinu segir að þrátt fyrir þetta sé lagasetningin mikilvægur áfangi í réttindamálum barna í landinu.

Umskurn kvenna, sem einnig er kölluð afskræming á kynfærum kvenna (FGM), er algeng í Norður-, Austur- og Vestur-Afríku. Aðgerðin felst í því að misstór hluti kynfæra stúlkubarna er skorinn af og telja þeir sem hlynntir eru slíkum aðgerðum að það dragi úr lauslæti og tryggi tryggð kvenna við eiginmenn sína.