Senda inn efni
Ástralskt samfélag er samfélag innflytjenda frá ýmsum heimshornum. Reuters
Neitað um landvist
Mikil reiði ríkir í bænum einum í Viktoríuríki í Ástralíu eftir að ungum pilti, Lukas Moeller, var neitað um landvistarleyfi. Moeller, sem er með Down syndrome, er sonur þýsks læknis sem er sá eini með sérfræðikunnáttu á sínu sviði.
Í rökstuðningi yfirvalda innflytjendamála segir að Moeller uppfylli ekki þær heilsufarslegu kröfur sem gerðar séu til nýbúa og að ástand hans muni kalla á veruleg útgjöld og verða baggi á mennta- og heilbrigðiskerfinu.
Ástralar hafa í áraraðir veitt á milli 100-200.000 landvistarleyfi ár hvert og þjóðinni því fjölgað hratt á síðustu áratugum, í um 21 milljón manna nú.
Faðir Moellers, læknirinn Bernhard Moeller, hefur verið ákaft studdur af þúsundum manna og John Brumby, ríkisstjóri Viktoríu, verið í hópi þeirra sem óskað hafa eftir því að ákvörðun yfirvalda verði endurskoðuð.
Vísaði Bernhard því á bug að Lukas yrði byrði á þjóðinni, enda myndu foreldrar hans sjá um umönnum hans. Þau þyrftu ekki á opinberri aðstoð að halda í þeim efnum.
Til baka