Abdullah Abdullah, fyrrverandi utanríkisráðherra Afganistans, hefur enn forystu þegar búið er að telja 80% atkvæðanna í forsetakosningunum sem fram fóru í landinu í byrjun aprílmánaðar.
Abdullah er með 43,8% atkvæða en hans helsti andstæðingar, Ashraf Ghani, kemur næst á eftir með 32,9%, að því er segir í frétt AFP.
Fái enginn frambjóðandi hreinan meirihluta atkvæða verður kosið aftur milli tveggja efstu í maímánuði og bendir nú allt til þess. Áformað er að endanleg úrslit kosninganna liggi fyrir um helgina.
Hvorki Abduallah né Ghani, sem er fyrrverandi hagfræðingur hjá Alþjóðabankanum, hafa í hyggju að draga sig í hlé og verður því að öllum líkindum kosið á milli þeirra í næsta mánuði. Stjórnmálaskýrendur benda hins vegar á að þeir geti, með einhverjum hætti, komist að samkomulagi til þess að koma í veg fyrir aðrar kosningar, sem eru bæði dýrar og tímafrekar. Fordæmi séu til staðar fyrir slíku.
Í frétt AFP segir jafnframt að ásökunum um kosningasvindl hafi fjölgað mjög að undanförnu. Kjörstjórnin hyggst rannsaka þær og þess vegna hafa endanleg úrslit enn ekki verið tilkynnt.