Faðir ungrar konu sem lést af völdum sára sinna eftir að hafa verið nauðgað af hópi karla í strætisvagni í Nýju-Delí á Indlandi gagnrýnir ráðherra sem lét þau orð falla að árásin hafi verið „minniháttar atvik“.

Fjármálaráðherra Indlands, Arun Jaitley, sagði á ferðaráðstefnu í gær að eitt lítið atvik, svo sem nauðgun í strætisvagni í Delí, hafi snúið heiminum á hvolf og kostað Indverja milljónir Bandaríkjadala þar sem ferðamönnum hafi fækkað.

Faðir ungu konunnar segir í samtali við AFP-fréttastofuna að ummæli Jaitleys, sem voru birt í sjónvarpi, hafi ýft upp sár vegna árásarinnar í desember 2012 og fjölskyldan sé harmi slegin vegna orða ráðherrans.

Unga konan var 23 ára gömul er henni var nauðgað hrottalega og síðan hent út úr vagninum á ferð. Nokkru síðar lést hún af völdum sára sinna og vakti árásin mikla reiði í heimalandinu sem og víða um heim. „Það sem hann sagði er alrangt. Ég get ekki lýst í orðum hversu mikið þetta særir okkur,“ segir faðir fórnarlambsins.

Hann gagnrýnir ráðherrann sem kvarti undan því að verða af fjármunum. Slík verðmæti megi sín lítið í samanburði við það sem fjölskyldan missti. Fjármálaráðuneytið hefur nú fjarlægt orðið „minniháttar“ úr ræðu ráðherrans á vef ráðuneytisins. Jaitley hefur einnig beðist afsökunar og segir að orð sín hafi verið slitin úr samhengi.

Arun Jaitley AFP

Tengdar fréttir

Kynbundið ofbeldi á Indlandi

Mótmæla nauðgun á níu ára stúlku

• 13 og 16 ára stúlkur fundust látnar
• Prestur handtekinn fyrir morð og nauðgun
• Hrottalegar nauðganir sem leiða til dauða
• Bálför án samþykkis fjölskyldu

» Fleiri tengdar fréttir

• Blogga um frétt