Lögreglan í Taílandi hefur borið kennsl á tvo menn sem eru grunaðir í tengslum við morðin á Hönnu Witheridge og David Miller. Annar maðurinn hefur verið yfirheyrður í tengslum við málið, en hinn hefur yfirgefið eyjuna þar sem morðin áttu sér stað.
Samkvæmt upplýsingum sem lögreglan í Taílandi gaf frá sér í dag eru mennirnir tengdir leiðtoga eyjunnar Koh Tao. Annar þeirra var yfirheyrður fyrir nokkrum dögum síðan, áður en honum var síðar sleppt. Hinn maðurinn hefur farið til Bangkok. Nú reynir lögreglan á svæðinu að hafa uppi á báðum mönnunum.
Lík Witheridge og Millers fundust fyrir rúmri viku síðan á eyjunni Koh Tao. Lögregla hefur skoðað ábendingu um að ástæða morðanna hafi verið afbrýðissemi, en Witheridge vildi ekkert með ungan, tælenskan mann hafa kvöldið sem hún var myrt er hann reyndi að spjalla við hana á bar á eyjunni.
Frétt mbl.is: Tvær konur rændar daginn fyrir morðin
Frétt mbl.is: Lík konunnar flutt heim
Frétt mbl.is: Parið myrt vegna afbrýðissemi?