Níddist á kind vegna prófastreitu

Nemandi í Fresno State-háskólanum í Kaliforníu var gripinn glóðvolgur þar sem hann níddist með kynferðislegum hætti á kind á dögunum. Maðurinn sagði álag hafa verið hvöt hans til að fremja ódæðisverkið.

Lögregla var kölluð til þegar annar nemandi í skólanum heyrði undarleg hljóð koma frá sauðfjárbúi sem tilheyrir skólanum. Þegar lögreglumenn komu á svæðið fundu þeir manninn, sem er 23 ára gamall og nemandi á fimmta ári í verkfræði, buxnalausan ofan á kindinni.

Maðurinn sagðist fyrst hafa verið að temja naut, en þegar lögregluþjónar sögðu honum að engir nautgripir væru á svæðinu sagðist hann hafa verið svo stressaður vegna prófa að hann hefði þurft að „meiða eitthvað“ og því hefði hann valið varnarlausa kind.

Samkvæmt KMPH fréttaveitunni játaði maðurinn að hafa haft samræði við kindina þegar lögregluþjónar spurðu hann hvers vegna hann væri með buxurnar á hælunum. Maðurinn sagði þetta vera í fyrsta skipti sem hann níddist á dýri, og játaði að hafa drukkið áfengi áður en atburðurinn átti sér stað. 

Maðurinn var handtekinn fyrir að hafa átt kynmök við dýrið og færður í fangelsi. Kindin er undir eftirliti dýralækna.

• Blogga um frétt