Blaðamönnum var meinað að nota regnhlífar þegar þeir biðu eftir komu kínverska forsetans Xi Jinping við flugvöllinn í Macau í dag þrátt fyrir úrhellisrigningu. Fjölmenn mótmæli hafa farið fram undanfarna mánuði í Hong Kong gegn kínversku kommúnistastjórninni og víðtækum afskiptum þeirra af áætluðum kosningum í landinu, en mótmælendur hafa gjarnan borið regnhlífar og mótmælin því víða verið nefnd „regnhlífabyltingin“.
Blaðamönnum voru gefnar ýmsar ástæður fyrir banninu, en meðal þeirra var hætta sem þær sköpuðu fyrir flugvélar í aðflugi auk þess sem þær gætu tekið á loft í vindi og valdið tjóni. Regnstökkum var því dreift í stað þeirra.
Forsetinn heimsækir Macau í tilefni þess að fimmtán ár eru liðin frá því að ríkið sameinaðist Kína á ný eftir löng yfirráð Portúgala. Enginn úr fylgdarliði forsetans bar regnhlífar og hópur mótmælenda sem hugðist ganga með regnhlífar að gististað forsetans var stöðvaður af lögreglu.
Mótmælendur furðuðu sig á ótta embættismannanna við regnhlífar, en einn þeirra, Jason Chao, spurði fréttamenn „hvernig svo voldugt yfirvald gæti óttast mátt lítilla gulra regnhlífa“. Þá sagði hann að yfirvöld „neituðu ítrekað að hlusta á skýrar raddir fólksins sem krefðist aukins lýðræðis“. Lögregluþjónar í Hong Kong lokuðu á dögunum búðum mótmælenda í ríkinu, en þeim hefur farið sífellt fækkandi undanfarnar vikur.