Austurrískur maður og tyrknesk kona voru handtekin um borð í flugvél á Vínarflugvelli í gær, eftir að hríðskotabyssa og skotfæri fundust í farangri þeirra. Átti flugvélin að fara frá Vín til Ístanbúl í Tyrklandi.
„Parið var komið um borð í flugvélina þegar hríðskotabyssan og skotfærin fundust í farangrinum sem þau höfðu innritað við komuna á flugvöllinn,“ segir talsmaður innanríkisráðherra Austurríkis í samtali við fréttaveitu AFP.
Engar vísbendingar eru um að parið, sem er í kringum fertugt, hafi ætlað að ganga til liðs við hryðjuverkasamtökin Ríki Íslams. Rannsókn á því mun þó halda áfram.
Austurríki er í hópi þeirra Evrópuríkja sem hafa séð fjölda fólks streyma úr landi til að ganga í raðir hryðjuverkamanna í Mið-Austurlöndum, en Tyrkland er helsta gáttin til þeirra landa.