Skólinn of hættulegur

Lögregla stendur vörð við Värner Rydén-menntaskólann í Malmö í dag en skólanum var lokað um helgina þar sem hann þykir of hættulegur fyrir nemendur og kennara vegna ofbeldis sem þar ríkir. 

Ákveðið var að loka skólanum um helgina eftir að Kennarasambandið lýsti því yfir að það væri of hættulegt fyrir kennara og nemendur að koma þangað vegna endurtekinna ofbeldisbrota og glæpa. Er þar meðal annars nefnt til sögunnar ofbeldi, hótanir og heimsóknir atvinnuglæpamanna í skólann sem er í Rosengård-hverfinu í útjaðri borgarinnar.

Í fjögur til fimm ár hafa nemendur og kennarar þurft að þola síendurtekið ofbeldi og slagsmál og í meiriháttar óeirðum sem brutust út á föstudag fengu kennarar einfaldlega nóg og töldu of hættulegt að vera í skólanum.