Kjörstaðir sums staðar í Nígeríu verða áfram opnir á morgun vegna tæknilegra vandamála sem komu upp við forsetakosningarnar í dag. Búnaður sem skannar meðal annars fingraför kjósenda bilaði víða og tók kjörstjórnin þess vegna þá ákvörðun að hafa áfram um þrjú hundruð kjörstaði opna á morgun.
Alls var kosið á um 150 þúsund kjörstöðum í Nígeríu í dag.
Kjósendur þurfa að skrá sig með fingrafaraskanna áður en þeir geta kosið. Þessir skannar stóðu sums staðar á sér og tók það til að mynda sjálfan forsetann, Goodluck Jonathan, fimmtíu mínútur að skrá sig þegar hann mætti á kjörstað í heimaþorpi sínu, Otuoke, fyrr í dag.
Búist er við því að lítill munur verði á milli fylgi forsetaframbjóðandanna, Goodlucks og Muhammadu Buharis.
Hafa báðir frambjóðendurnir heitið því að stöðva ofbeldið sem hefur verið áberandi í landinu vegna hryðjuverkasamtakanna Boko Haram. Frá árinu 2009 hafa liðsmenn samtakanna myrt þúsundir og þvingað millijónir til að flýja heimili sín í norðausturhluta Nígeríu. Jafnframt hafa þeir ráðist á þorp í nágrannaríkjum Nígeríu, Tsjad og Kamerún.